التدخين ، السجائر .، الشيشة ، الصحة افضل

مش انت مدخن وأسد وماحدش قدك? وانتي ياحلوة ياللي بتتفشخرى بالشيشة علي الكافية؟! تعالوا علي جنب كدة عايزكم نزل ايدك بس، ياجدعان فية ايه? وربنا ماهاضربهم، هافهمهم غلطهم بس

الانسان فاكر ان صحته حق مكتسب مش هتروح منه مهما شرب سجاير، لكن وقت الجد والمرض بتكون في اضعف حالاتك وبتعرف انك غلطان

شاب 45 سنة باشا في نفسه، مابيشربش اقل من مارلبورو احمر مش السجاير المعفنة بتاعتكم 

بيدخن علبتين في اليوم سجاير نضيفة خفيفة مش المعفنة بتاعتكم

جالي العيادة بيشتكي من حرقان في صدره مش سايبه بقاله يومين ، وجع مش مرتاح ولا عارف ينام، بسرعة أكو ورسم قلب اتضح انها جلطة بالقلب

توجهنا فورا من العيادة للمستشفى لعمل قسطرة عاجلة على الشرايين التاجية للقلب وظهر فعلا انسداد كامل بالشريان التاجي الايسر الملتف (السدد >السهم الاحمر، وعلامة الاستفهام ؟ختفاء تام للشريان) ماسورة دم رئيسية اتسدت بجلطة، خطورتها لو ماتلحقتش في وقتها تصل من ضعف بعضلة القلب الي لاقدر الله وفاه في اول 48 ساعة بتوقف مفاجئ بعضلة القلب

والله الموضوع مش هزار وان كان بيعدي بتقدم الطب وقبله ستر الله وكرمه، في شباب كتير تاني مابتعديش

 نرجع للشاب الجميل المدخن، مدخن وبس، ماعندوش اي حاجة تاني غير التدخين وسنه صغير واخدلي بالك انت اصل في ناس مستفزة تقولك السجاير مابتعملش حاجة وكله كلام، طيب يا أخي بص علي أسنانك شوفها أسودت وضعفت ازاي؟! فما بالك القلب والرئة بقى شكلهم ايه؟! ،وباء عايز يفتك بك وبأولادك وبيتك لازم تواجهه بعزم قوتك ،مش تصاحبه وتسيبه يدمرك

الحمد الله تم توسيع الشريان وتركيب دعامة دوائية وظهر زي ما في الصورة شريان كبير مغذي عضلة القلب بثلاثة أفرع ( السهم الاخضر >الشريان مفتوح، والنقط الخضراء > الأفرع المنبثقة منه، حلوة المنبثقة دي )

طيب ما قشطة انا ادخن بقي وانبسط ولما يجيلي جلطة أجيلك تركبلي دعامة 

ياااجدعاااان وربنا ماهضربه، سيبني بس هتكلم معه بالعقل، بالعقل أهو، انت يعني علشان ربنا سترها معاك مرة هتعدي كل مرة?؟ بقولك هتموت تقولي هبقي اجيلك تاني!!!.. هو البعيد إيه مابيفهمش  هات ياعم سجارة حرقت دمي  بس تكون مارلبورو احمر مش السجاير التانية المعفنة بتاعتكم 

والله لو تسمعوا كلامي، بطلوا سجاير وأشربوا شاي بلبن..مافيش انسان شرير ابدا بيشرب شاي بلبن دمتم_بصحة_وخير #@?؟