سعر الذهب اليوم فى أسواق العالم سجل النهاردة 1755 دولار للاونصه ما يعادل تقريبا

         سعر الذهب اليوم فى أسواق العالم
 سجل النهاردة 1755 دولار للاونصه ما يعادل تقريباً 42997 جنية لكن السعر فى السوق المحلى الذهب سجل أعلى من كده كتير 51615 جنية للاونصة 

ورغم أن سعر الذهب زاد النهاردة فى الأسواق العالمية بشكل بسيط متأثر بتصريحات من الفيدرالى الأمريكى عن حجم التضخم والركود لكن يبدو إن العوامل دى بعيدة عن التأثير على سعر الذهب فى مصر اللى بتحكمه عوامل ثانية بعيده عن مبادئ السوق الحقيقية

الذهب فى مصر سجل انخفاض امبارح بمقدار 65 جنية لكن رجع النهاردة للزيادة وسجل الجرام 1668جنيه عيار 24 فى نفس الوقت اللى بيزيد فيه سعر الدولار اللى وصل النهاردة ل 24.65 جنية

المفروض مع اى زيادة فى سعر الدولار الذهب ينزل فى السعر لكن اللى مش مفهوم اقتصاديا أن الاتنين يصعدوا مع بعض 

سعر الدولار متوقع يرتفع خلال شهر 12 بسبب عامل رئيسى مهم وهو أن شهر ديسمبر آخر السنة واعياد الكريسماس ودى الفترة اللى الشركات والمستثمرين الأجانب بتحول فيها أرباح شغلها فى مصر الى الخارج فبيحصل ضغط على طلب الدولار ومن هنا بيزيد السعر لكن مع بداية السنة الجديدة وانتهاء ضغط الطلب ده بيرجع سعر الدولار للنزول مرة تانية 

أما الذهب فى مصر فللأسف سعره لا يخضع لعوامل التسعير الاقتصادية ويبدو أن هناك من يتحكم فى رفع السعر فوق الحد الطبيعى للسوق مستغلا قرار تحرير سعر صرف الجنية بالكامل 

ومن هنا بنسمع أن كبار التجار وشركات الذهب بتسعر الذهب على أساس سعر الدولار 30 جنية على عكس السعر الحقيقى فى السوق اللى هو 24.65 النهاردة يعنى اكتر من السعر الحقيقى ب 5.5 تقريبا وده بيخلق سعر وهمى مصطنع يتم تصديره للناس للتعامل به فى شراء الذهب والمستفيد طبعا هم كبار التجار والشركات اللى بتجنى ارباح هائلة لكن المشكلة أن اللى بيحصل ده زى اللى بينفخ بالونه اكتر من طاقتها وهتيجى اللحظة اللى البالونة تفرقع والسعر ينهار بشكل كبير وده متوقع أيضا لأسعار الدهب العالمية اللى كل تحليلات الخبراء بتقول أنه ممكن يوصل لعتبة 2000 دولار للاوقيه ثم يعقبها انهيار يصل بالسعر ل 1200 دولار لكن حركة السعر العالمى هنا والتوقعات دى مبنيه على مؤثرات السوق العالمى زى العرض والطلب وسعر الدولار وحالة التضخم والكساد العالمى مش عوامل مفتعلة زى ما بيحصل فى السوق المصرى دلوقتى .
المشكلة الكبيرة فى حالة انهيار سعر الدهب وده متوقع قريب جدا فى مصر إن الأشخاص اللى استثمروا فى شراء الذهب بسعر عالى ومبالغ فيه خسائرهم هتكون فادحة فى حال قرروا البيع العاجل مع نزول السعر لتقليل الخسائر والمشكلة الأكبر إن مفيش تجار تشترى وهتحصل مشكلة فى بيع الذهب المشغول وتمتد للسبائك لأن الخسائر هتكون للتجار والافراد فى نفس الوقت 

# الاونصة من الذهب تعادل 31 جرام تقريبا
ترند اللحظة ٢٠٥٠ The trend of the moment 2050